மருதமூரான்

தமிழ் சினிமாவில் 80 வீதமான படங்கள் காதலையும், அதனால் ஏற்படுகின்ற விளைவுகளையும் வைத்தே வருகின்றன. அப்படி வருகின்ற படங்களில் திரைக்கதையில் வேறுபாடுகளையும், ஆளுமையையும் காட்டுகின்ற படங்கள் அனேகமாக வெற்றி பெறுகின்றன. ‘ஆனந்த தாண்டவம்’ பாரிய திரைக்கதை மாறுதல்களைக் கொண்டிருக்காவிட்டாலும் ரசிக்கும்படி உருவாக்கப்பட்டுள்ளது. இதில், அறிமுகநாயகன் சித்தார்த், தமன்னா, ‘பொம்மலாட்டம்’ புகழ் ருக்மணி, கிருஷ்ணா, கிட்டி, மதன்பாப், சார்லி, அம்மு உள்ளிட்ட பலர் நடித்துள்ளனர். ஜி.வி.பிரகாஷ்குமார் இசையமைக்க, ஜீவா சங்கர் ஒளிப்பதிவு செய்துள்ளார். படத்தொகுப்பை வி.ரி.விஜயன் செய்ய, பாடல்களை கவிப்பேரரசு வைரமுத்து எழுதியுள்ளார்.

தமிழ்நாட்டின் திருநெல்வேலியில் இருக்கும் பொறியியலாளர் சித்தார் வேலைவாய்ப்பின்றி தந்தை கிட்டியுடன் இருக்கின்றார். அதே பகுதியில் தமன்னாவின் குடும்பமும் வசிக்கின்றது. இதன்போது தமன்னாவுக்கும், சித்தார்த்துக்கும் அறிமுகம் ஏற்பட்டு அது காதலாக மாறி, பெற்றோரின் சம்மதத்துடன் நிச்சயதார்த்தம் வரை செல்கின்றது. இந்த தருணத்தில் வேலை கிடைத்து புனே செல்லும் சித்தார்த், திருமண திகதி முடிவு செய்யப்பட்டதைத் தொடர்ந்து தனது கிராமம் திரும்புகின்றார். பின்னர் காதலியை பார்க்கச் செல்லும் சித்தார்த்துக்கு, மிகப்பெரிய அதிர்ச்சியாக தமன்னாவுக்கு, அமெரிக்க மாப்பிள்ளை ஒருவருடம் திருமணம் என்று தெரிந்து மனவேதனையுடன் திரும்பி, தற்கொலைக்கு முயல்கின்றார். அதிலிருந்து மீண்டு அமெரிக்காவிற்கு மேல் படிப்புக்காகச் செல்கின்றார். அமெரிக்காவில் ருக்மணியை சந்திக்கும் சித்தார்த் பின்னர் அவரது முன்னாள் காதலி தமன்னாவை சந்திப்பதும், தமன்னா சந்திக்கும் பிரச்சினைகளும், தமன்னாவின் இறுதி முடிவுமே ‘ஆனந்த தாண்டவம்’.

அறிமுகநாயகன் சித்தார்த் தனக்கு வழங்கப்பட்ட பாத்திரத்தை மிகையில்லாமல் செய்து தமிழ் சினிமாவில் தனக்கான இடத்தை பிடித்துள்ளார். தமன்னாவுக்கு ‘கல்லூரி’ படத்திற்கு பின்னர் தனது திறமையை வெளிப்படுத்த கிடைத்திருக்கும் படம் இது. துடுக்குத்தனமான அதேநேரம் அனைவரையும் நம்பும் ஏமாளிப்பெண்ணாக வாழ்ந்து இறுதியில் பாவம் உயிரை விடுகின்றார். ‘பொம்மலாட்டம்’ புகழ் ருக்மணி அமெரிக்காவில் வாழ்ந்தாலும் பாவாடை தாவணியுடன் கிராமத்து வாழ்வுக்காக ஏங்கும் பாத்திரத்தில் பந்தமாகப் பொருந்தியுள்ளார். ருக்மணியை தமிழ் சினிமாவில் தொடர்ந்தும் எதிர்பார்க்கலாம். அமெரிக்காவின் மாணவராக வரும் கிருஸ்ணா குறைந்த நேரங்களிலே வந்தாலும் அமெரிக்க குடியுரிமைக்காக ஏங்கி இந்திய குடியுரிமை கொண்ட வெள்ளைப் பெண்மணியை மணப்பது ரசிக்க வைக்கிறது.

ஆனந்த தாண்டவத்தின் இசையால் ஜி.வி.பிரகாஷ்குமார் ஆர்ப்பாட்டமில்லாமல் இரசிக்க வைக்கிறார். வைரமுத்து எழுதியுள்ள ‘கனா காண்கிறேன்’ ‘சுக்கு சுக்காய்’ பாடல்கள் அருமை. அமெரிக்காவையும், தமிழ்நாட்டையும் அதிக அழகேடு தந்திருக்கின்றார் ஒளிப்பதிவாளர் ஜீவா சங்கர். சில இடங்களில் திரைக்கதை ஓட்டத்தை தாண்டி பின்னணியிலுள்ள காட்சிகளை தேட வைத்திருக்கிறார். அதனை குறைத்திருக்கலாம். கலை இயக்குனர் தோட்ட தரணி அவரின் வண்ணம் தொடர்கிறது. படத்தொகுப்பை வி.ரி.விஜயன், இயக்குனரின் வேண்டுகோளுக்கு இணங்க கத்திரி வைத்திருக்கின்றார்.

ஆனந்த தாண்டவத்தின் கதை, வசனம் சுஜாதா. ‘மற்றவர்களின் விருப்பத்தை நிறைவேற்றியே, எனது வாழ்க்கையை தொலைத்து விட்டேன்’ போன்ற படத்தின் இறுதிக்கட்ட வசனங்கள் மிகவும் அருமை. 1980களில் வந்த நாவலொன்றை 2000களுக்கு ஏற்றவடிவில் திரைக்கதையாக வடிவமைப்பதில் ஏ.ஆர்.காந்தி கிருஷ்ணா சில இடங்களில் சிரமப்பட்டுள்ளமை தெரிகிறது. கதாபாத்திரங்களில் குண இயல்புகளை சில காட்சிகளிலேயே புரியவைப்பதில் சபாஸ் போட வைக்கிறார் ஏ.ஆர்.காந்தி கிருஷ்ணா. ஆனாலும் என்னவோ குறை இருப்பது போல தோன்ற செய்கிறது. ‘ஆனந்த தாண்டவம’, நாவல்தனமான நல்ல சினிமா, வர்த்தக ரீதியில் வெற்றியளிக்குமா என்பது கேள்விக்குறியே.

சமூகமொன்றில் அதிகளவில் கருத்துக்கள் தெரிவிக்கப்பட்டு அல்லது ஆராயப்படுகின்ற போதிலேயே உண்மையான வளர்ச்சியும், ஜனநாயகமும், மனித உரிமைகளும் மேம்படுகின்றன. அவை இல்லாது போகும் பட்சத்தில் மனித இனம் அபிவிருத்தி நிலைகளிலிருந்து நழுவி மீண்டும் காட்டு மிராண்டித்தனங்களின் உச்சத்திற்கு சென்றுவிடும். இதற்கு மியன்மார்க், சிம்பாவே, பாகிஸ்தான், இலங்கை போன்ற நாடுகள் மிகச் சிறந்த உதாரணங்கள் (உலகத்தின் மிகப்பெரிய சனத்தொகையை கொண்டுள்ள ஆசியா மற்றும் ஆபிரிக்கா நாடுகள் பலவற்றில் கருத்து சுதந்திரம் மறைமுகமாக பறிக்கப்பட்டுவிட்டன). இந்த நாடுகளில் கருத்து சுதந்திரம் இருந்த காலப்பகுதிகளில் ஏற்பட்ட அபிவிருத்தியும், கல்வியறிவும் இப்போது இல்லை. அவை திட்டமிட்டு தடுக்கப்படுகின்றன. ஓவ்வொரு மனிதனுக்கும் இருக்கின்ற கருத்து சுதந்திரம் தொடர்பில் மேற்குறி;ப்பிட்ட நாடுகளில் வாழ்கின்ற மக்கள் அறிந்திருக்கின்ற போதிலும் அதனை வெளிப்படுத்த ஆட்சியாளர்களின் அதிகாரம் அனுமதிப்பதில்லை.

மாறாக, சிறந்த கருத்துக்கள் வெளிப்படும் பொழுது அதனை செவிமடுக்காவும் தற்போதுள்ள இளைய சமூகம் தயாராக இருப்பதில்லை. அவர்களின் வேகமான வாழ்கை முறையில் சிறந்த கருத்துக்களுக்கு இடமில்லாமல் போய் ஆடம்பரங்களும், களியாட்டங்களும் ஆக்கிரமித்து விட்டன. இணையம், ஒளி-ஒலிபரப்பு ஊடகங்கள், திரைப்படத்துறை என்பன முற்றுமுழுதாக வர்த்தகமயமாக்கப்பட்டு விட்டதாலும் இந்த நிலை அதிகரித்திருக்கின்றது. ஒரு கருத்தை நிதானித்து கேட்பதற்கு தற்கால இளைஞன் தயாராகவில்லை. மாறாக பணத்தை விரைவாக சம்பாதிக்கும் வழிமுறைகளைத் தேடுகின்றான். இறுதியில் அதற்கே அடிமைப்பட்டு வாழ்வையும், அவனது சிந்தனை வளர்ச்சியையும் தொலைக்கின்றான். இதனால், எதிர்கால சமூகத்தின் அபிவிருத்தி தடைப்படும் சாத்தியம் அதிகரிக்கின்றது.

ஓவ்வொரு சமூகத்திலும் கருத்துக்களின் பகிர்வுகளுக்கு தற்போது அதிக களங்கள் கிடைப்பதில்லை என்பது உண்மை என்ற போதிலும், அதற்கான களம் கிடைக்கின்ற போது அதனை பயன்படுத்த தற்கால சமூகம் தயாராகவில்லை. கருத்துக்கள் பகிரப்படுதல், தெரிவிக்கப்படுதலே காடுகளிலும், கற்குகைகளிலும் வாழ்;ந்த மனிதனை நவீன உலகிற்கு கொண்டு வந்தது. அவன் கொண்டு வந்த நவீன உலகில் கருத்து பகிர்தலிற்கு இடமில்லாமல் போகும் பட்சத்தில் மனிதனை மீண்டும் அவன் கற்கால யுகத்திற்கு செல்ல நேரிடலாம். கருத்துக்கள் தெரிவிக்கப்படுவதும், பகிரப்படுவதுமே சமூக வளர்ச்சியின் அடிப்படை.

ஈழத்தில் மோதல் தவிர்ப்பு செய்யப்பட வேண்டும் என்று கலைஞர் கோருகின்றார்… அதற்காக இந்திய மத்திய அரசு, ஓரிரு தினங்களுக்கு முன் பாதுகாப்பு செயலர் உள்ளிட்ட இருவரை இலங்கை அரசுடன் பேச அனுப்புகிறது. மறுநாள் இந்திய மத்திய அரசின் செயற்பாடுகள் திருப்தியளிப்பதாக கலைஞர் அறிவி;கின்றார். ஆனால், அதற்கு அடுத்த நாள் மீண்டும் உண்ணாவிரதம் இருக்கின்றார். இந்திய மத்திய அரசு 100 கோடி ரூபாய்கள் ஈழத்தமிழர்களுக்காக ஒதுக்குகின்து. அதன் பின்னர் கலைஞரின் போராட்டம் கைவிடப்படுகிறது. இதில் வெற்றி எங்கு இருக்கின்றது, 100 கோடியினால் ஈழத்தமிழர்களின் வாழ்க்கையில் உரிமைகளும், உடைமைகளும் கிடைத்து விடவா போகின்றது. இல்லவே இல்லை மாறாக தமிழக மக்களை ஏமாற்றி வாக்கினை பெற்றுக் கொண்டு வயிறு வளர்ப்பார்கள்.

இலங்கையில் தனி ஈழம் என்பது தேவையற்றது என்று கடந்த ஒரு தசாப்த காலத்துக்கும் மேலாக கூறி வந்த தமிழகத்தின் மற்றுமொரு புரட்சி தலைவி செல்வி ஜெயலலிதா ஜெயராம், தனி ஈழம் அமைப்பதற்காக 10000 கோடி ரூபாய் வழங்குவேன் என்கிறார். ஈழத்தமிழர்களுக்காக உண்ணாவிரதம் இருக்கின்றார். எவ்வளவு பெரிய மனது அவருக்கு. தமிழக தமிழர்கள் ஜெயலலிதாவை கைவிட்டால் ஈழத்தமிழர்களுக்கு ஈழமில்லை, தமிழக தமிழர்களுக்கு வாழ்வில்லை. எப்படியிருக்கின்றது இந்தக்கணக்கு. ஈழத்தில் தமிழர்கள் அனுபவிக்கும் கொடுமைகள் அனைத்தையும் பயன்படுத்தி வாக்குகளைப் பெற்றுவிட வேண்டும் என்பதில் ஜெயலலிதாவின் முயற்சி படுவேகம். இதனை தமிழக மக்கள் எவ்வாறு கையாளப் போகிறார்கள் என்பது இன்னும் சில வாரங்களில் தெரியலாம்.

தமிழக தமிழர்களின் இதயங்களில் ஈழத்தமிழர்களுக்கான இடம் எப்போதும் இருக்கின்றது. என்பது உண்மை. ஆனால், அவர்களுக்கு ஞாபக மறதியும் அதிகமாகவே இருக்கின்றது என்பது தான் அதிக வருத்தத்தை தருகின்றது. கலைஞர் நேற்று சொன்னதை மறந்து விட்டு இன்று சொன்னதிற்கு தலை அசைக்கின்றார்கள். அதுபோல், ஜெயலலிதா நேற்று சொன்னவை இன்றைய வார்தைகளில் அடிபட்டு போகின்றன. தமிழக மக்களின் இந்த ஞாபக மறதி கலைஞருக்கும், ஜெயலலிதாவுக்கும் தொடர்ந்து சாதகமாக அமைந்து விடுகின்றது என்பது மறுக்கவும், மன்னிக்கவும் முடியாத உண்மை. பொறுத்திருந்து பார்க்கலாம் அடுத்து வரும் நாட்களில் என்ன கூத்துக்களெல்லாம் நடக்க போகின்றவோ!.

உலகின் மிகப்பெரிய ஜனநாயக நாடு என்று சொல்லப்படுகின்ற இந்தியாவில் வாக்களிப்பு 60 வீதத்தினை தாண்டுவதில்லை என்பது நிதர்சனம். அதுபோல, இலங்கையில் 58 வீதத்தினை தாண்டுவதில்லை. இவ்வாறான நிலைமைகள் தொடர்ந்து கொண்டேயிருக்கின்றன. இவற்றில் முக்கியமான விடயம் என்னவென்றால் வாக்குரிமை குறித்து வாய்கிழியப் பேசுகின்ற கல்வியறிவு பெற்ற மக்களில் 50 வீதத்துக்கும் குறைவானவர்களே வாக்களிக்கின்றனர். இவர்கள் வாக்களிக்காது தமது வாக்குரிமையை வீணடிக்கின்ற போது, அவை கள்ள வாக்குகளாக குண்டர்களினால் போடப்பட்டுவிடுகின்றன. இதனால், நல்ல (ஓரளவு) அரசியல் தலைவர்கள் வெற்றி வாய்ப்பை இழக்கும் நிலை தொடர்ந்து கொண்டிருக்கின்றன.

வாக்களிப்பதில் அதிகளவில் பங்குகொள்ளும் மக்கள் வறுமைக்கோட்டுக்கு உட்பட்ட மற்றும் மத்தியதர வர்க்கமே. இவர்களின் வாக்குகளையே குறிவைத்து அரசியல் நடத்துகின்ற அரசியல் பெருச்சாளிகள் கையூட்டுக்களையும், மதுபானங்களையும் வழங்கி வாக்குகளை பெறுகின்றன (இது இந்தியாவிலும், இலங்கையிலும் தொடர்கின்ற செயற்பாடுகள்). இதனால், குண்டர்களையும், அடியாட்களையும் வைத்திருக்கின்ற அரசியல் நரிகள் தொடர்ந்தும் ஆட்சியதிகாரத்தை தக்கவைத்துக் கொண்டிருக்கின்றன. இவர்கள் தமது வங்கி வைப்புக்களையும், சொத்துக்களையும் பெருக்கிக்கொண்டே போகின்றார்களே தவிர நாட்டையோ, நாட்டு மக்கள் குறித்தோ சிந்திப்பதில்லை.

வாக்குரிமை என்பது ஜனநாயகத்துக்கு எவ்வளவு முக்கியமோ, அதேயளவு வாக்களிப்பும் முக்கியம். ஆனால், வாக்களிக்காத நிலைமை தொடர்ந்தும் அதிகரித்து செல்வதால் ஜனநாயகத்தின் அடிப்படையே ஆட்டம் காண்கிறது. இதனால், மக்களின் உரிமையும், சுதந்திரமும் திட்டமிட்டு பறிக்கப்படுகின்றன அல்லது பறிக்கப்படும் நிலைமை அதிகரிக்கின்றது. இந்த நிலை தொடர்வது நல்லதல்ல. ஒரு சாரார் சொல்லக்கூடும் களத்தில் நிற்கின்ற அனைத்து அரசியல் தலைவர்களுமே ஊழல்வாதிகள், பயனற்றவர்கள் என்று. அவர்களில் ஊழல் குறைவாகச் செய்தவர்களுக்கு வாக்களியுங்கள். அடுத்த முறையாவது அவர்கள் திருந்திக்கொள்ளுவார்கள். இல்லாவிட்டால் புதியவர்களை தேர்தெடுங்கள் நம்பிக்கை பிறக்கும். உங்களது கருத்துக்களை ஊடகங்களிலோ, கூட்டங்களிலோ கூறுவதை விட வாக்களித்து நிரூபிப்பதே புத்திசாலித்தனம். நல்ல தலைவர்களை தோற்றுவிப்பதற்கு அனைவரும் வாக்களிப்பதே சிறந்த முறை…. மாறாக வாக்களிப்பை புறக்கணிப்பதல்ல…